الجمعة، 29 يوليو، 2011

رمضان .. فرصة لتحرر من العادة السرية



بدش على طوول بالموضوع

الانسان بعد البلوغ تصير له وايد تغيرات جسمية او هرمونية او نفسية

واحدها الغريزة الجنسية



الغريزة الجنسية شيء كبير وعجيب واذا ما فهمناها صح ممكن تضيع الانسان بدنيته , واخرته

الغريزة الجنسية شي وايد حلو الله عطانا اياها , بس متى نمارسه ؟

بعد الزواج انزين لو نفترض واحد مايقدر يتزوج بسبب صغر سنه ولا لأي سبب ثاني غريزته ,



شنو يسوي فيها ؟! شلون يفرغها ؟!



الشباب والبنات للاسف البعض منهم يلجأ لشيء كريه ووضيع

واهو العادة السرية شنو العادة السرية



العادة السرية أو ما يسمى بالاستمناء وهو العبث في الأعضاء التناسلية بطريقة منتظمة ومستمرة بغية استجلاب الشهوة والاستمتاع وتنتهي هذه العملية عند البالغين بإنزال المني



هذا تعريفها اذا انت او انتي تمارسينها الله بيعطيك فرصة الحين ابيكم تحطون هدف انه خلال شهر رمضان


ماتمارسونها ولا مرة !!!!!!!!!!!



سولك جدول خاص وسري بينك وبين نفسك قسمه 30 قسم وكل يوم ماتمارس فيه العادة السرية برمضان حط صح على المربع

ماراح اتكلم عن اضرار العادة السرية لان اكيد اذا انت كنت تمارسها انت اعلم شنو اضرارها وشلون تاعبه نفسيتك وصحتك

واكيد عارف حكم العادة السرية

حــرام + حـــرام + حــرام

الله خصص لنا الطرق اللي نفرغ فيها طاقتنا الجنسية وهي :

(إلا على أزواجهم أو ما ملكت أيمانهم فإنهم غير ملومين ــ فمن ابتغى وراء ذلك فأولئك هم العادون)

حل العادة السرية انك تبتعد عن كل شيء يثيرك وتكافأ نفسك كل ما فزت على شيطانك

وتذكر انه الله يراقبك في سرك وعلانيتك والنفس امارة والله قيوم وكل ماتركت ذنب خوف من الله ابيك تذكر

هذه الاية وتخليها في بالك مع كل معصية (ولمن خاف مقام ربه جنتان) مو وحدة ,,

الله واعدك بثنتين

ترك العادة السرية مو شيء سهل والله حاس فيكم ولا هو صعب بس

انت قوي و انتي قوية اقوى من غريزة تحركنا وتحدد حياتنا وتعيشنا بعزله عن الناس

رمضان مابقى شيء عليه ويدخل علينا انتهز وانتهزي هالفرصة

انكم تتغيرون وتتركون هالعادة الكريه وتوقفونها والله بتحسون بقوة بجسمكم , قوة بتفكيركم

والاحلى لذة الانتصار على النفس


بسنا قعدة وتأجيل ,, اليوم وقتك ,, هاللحظة ممكن تغير فيها حياتك

تشجع ,, واقطع

تشجع ,, وصير عجيب

تشجع ,, وانتصر

تشجع ,, وذوق طعم النجاح

حياة عجيبة وكبيرة تنتظرك

الأربعاء، 13 يوليو، 2011

ابي اضعف برمضان !!



السلام عليكم

اعضائي العجيبين في كل مكان ..

هالمرة بحاور البنات اكثر ,, السؤال اللي كل بنت تساله وتحوس ولا تلقى له اجابة

شلون اضعف برمضان ؟!

طبعا هاليومين كل المنتديات تنتشر فيها رجيمات .. اشكال والوان
والله اشياء غريبة عجيبة لقيتها بالمنتديات او وصلتني في البلاك بيري

انا بعطيكم رجيم سهل وبسيط .. وانا طبقته بنفسي
رمضان شهر المائدة تنترس فيها اكل اشكال الوان
والنفس تبي .. وخصوصا احنا نكون صايمين يوم كامل .. نيي على الفطور تعبانين .. ونشوف هالاكل اللذيذ
ورمضان له جو وايد عجيب
اطباق ماتتسوى طول السنة تتسوى بس برمضان


يعني اختي العزيزة .. من صجج بتعوفينها ؟!




انا بعطيج خوووش رجيم ومجرب
انا كان وزني تقريبا 90 kg والحين وصل تقريبا 70 kg مو السبب كان هذا الرجيم
كنت مسوي رجيم قبل رمضان بس كان فاشل .. كان بو خس الصبح والغدا برتقال واكل كلش قليل
كنت احيانا احس اني بغشي بسبب هالاكل .. لاني شاب واحتاج لطاقة .. وهاالاكل القليل اللي كنت اكله مايسد الحاجة اللي كان يبيها جسمي
وخصوصا مع الرياضة كنت اتعب وايد

AnYwaY
ندش بالرجيم على طوول

برمضان تنقسم الوجبات الى ثلاث :
فطور + تصبيرة + سحور

فطور : بلشوا بـ 3 تمرات وماي . اكلوا كل شيء موجود على الطاولة بس بكمية معقوله .. عندك صحن واحد فقط مسموح لك تحط فيه
تصبيرة : فواكة او مكسرات او حلويات ( كمية قليلة .. اسمها تصبيرة موغدا )
سحور : طبعا الوجبة العجيبة اللي تاكلونها .. وتساعد انها ترطب ريجكم طوول اليوم اهيه روب مع 5 تمرات (وجبة عجيييييبة ومشبعه وايد)

طبعا ماكو ضعف بدون رياضة
حاولوا باليوم تمشون على الاقل ساعة .. ويفضل تحط سبحة بيدك تسبح فيها وتستغفر وراح تشوف الوقت يطير



باذن الله .. ارادة قوية .. مع هالرجيم .. والرياضة ..



بتنزلون من 5 الى 8 كيلو برمضان
يعني على العيد .. بتكونون عجيبـــيــــن ان شاء الله

ملاحظات :
- رمضان شهر عبادة .. لا تضيعونه بهالرجيمات اللي مالها داعي
- تمتعوا بالاكل .. بس لا نكثر
- < ان بدنك عليك حق > حديث شريف
- الضعف ,, والجسم حلو ,, شيء مهم ,, بس مو كل شيء
- الاولوية في رمضان هي العبادات ونحاول قد مانقدر نحصل اجر لان الاجر مضاعف فيه
- لايصير رمضان .. عرض ازياء .. واستعراض للبس والاكل



وامنيات من قلبي لكل من يبحث عن رجيم عجيب .. انه يجرب الرجيم اللي كتبته لكم .. ويدعيلي من بعدها